ԽՈՐՀՐԴԱՐԱՆԻ ՕՐԻՆԱԳԾԵՐԸ

ՀՀ ազգային ժողովն ընդունեց ՀՀ քրեական և վարչական իրավախախտումների վերաբերյալ օրենսգրքերում փոփոխություններ նախատեսող հետևյալ դրույթները՝
Արտակարգ դրության ժամանակ մեկուսացման կամ ինքնամեկուսացման պահանջները խախտելու դեպքում սահմանել վարչական պատասխանատվություն` 300.000- 500.000 ՀՀ դրամի չափով:

Մեկուսացման կամ ինքնամեկուսացման պահանջները խախտելը, որն անզգուշությամբ առաջացրել է մարդկանց զանգվածային հիվանդացում, պատժել տուգանքով՝ 300.000- 500.000 ՀՀ դրամի չափով կամ կալանքով առավելագույնը 1 ամիս ժամկետով, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը 2 տարի ժամկետով կամ առանց դրա:

Մեկուսացման կամ ինքնամեկուսացման պահանջները խախտելը, որն անզգուշությամբ այլ անձանց լուրջ առողջական խնդիրներ է պատճառել պատժել տուգանքով՝

500.000-700.000 ՀՀ դրամի չափով կամ 1-3 ամիս ժամկետով կալանքով կամ առավելագույնը 2 տարի ժամկետով ազատազրկմամբ։

Մեկուսացման կամ ինքնամեկուսացման պահանջները խախտելը, որն անզգուշությամբ այլ անձի մահ է առաջացրել պատժել ազատազրկմամբ 2-4 տարի ժամկետով, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով։

Կորոնավիրուսով մեկ, երկու կամ ավելի անձանց, ակնհայտ հղի կնոջն կամ անչափահասին դիտավորությամբ վարակելը պատժել տուգանքով՝ 400.000-1.000.000 ՀՀ դրամի չափով կամ 1-3 ամիս ժամկետով կալանքով կամ 3-5 տարի ժամկետով ազատազրկմամբ:

Ֆիզիկական և իրավաբանական անձանց կողմից արտակարգ դրության ժամանակ սահմանված տեղեկությունների հրապարակման կամ տարածման սահմանափակումները խախտելու դեպքում տուգանել 50.000-300.000 ՀՀ դրամի չափով չափով:

Ավելին՝ հղումով

ՀՀ ԿԱՌԱՎԱՐՈՒԹՅԱՆ ՈՐՈՇՈՒՄՆԵՐ

Հայաստանի Հանրապետությունում արտակարգ դրություն հայտարարելու վերաբերյալ

Հաշվի առնելով աշխարհում և Հայաստանի Հանրապետությունում նոր կորոնավիրուսային հիվանդության (COVID-19) տարածման դեպքերը ՝Հայաստանի Հանրապետության կառավարությունը որոշում է կայացրել 2020 թվականի մարտի 16 -ից ժամը 18:30-ից սկսած մինչև ապրիլի 14-ը ժամը 17:00-ն ներառյալ ժամկետով հայտարարել Արտակարգ դրություն։ Ստորև կներկայացնենք «Արտակարգ դրություն հայտարարելու մասին» որոշման և ՀՀ Պարետատան կողմից ընդունված փոխկապակցված որոշումների հիմնական դրույթները՝

ՀՀ մուտք և ելքի հատուկ կարգ՝ մասնավորապես, ռիսկային երկրներից օտարերկրացիներիելքիևմուտքի (ցամաքային կամ օդային եղանակով) արգելք, ՀՀ քաղաքացիների ցամաքային եղանակով ելքի անհնարինություն:

Որոշակի համայնքներ մուտքի ու ելքի հնարավոր սահմանափակում (ՀՀ Պարետի լրացուցիչ որոշմամբ):

Վարակի առկայության կամ կասկածի դեպքում մեկուսացման (ինքնամեկուսացման) պահանջ:

Առանձին հաստատություններ Ելքի և մուտքի սահմանափակումներ (մասնավորապես՝ զորամասեր, բանտեր, ծերանոցներ, մանկատներ, հոգեբուժարաններ և այլն):

20-ից ավել անձանց մասնակցությամբ հանրային միջոցառումների արգելք (մասնավորապես՝ ծնունդ, հարսանիք, հոգեհանգիստ և այլն):

Ուսումնական կանոնավոր գործընթացների դադարեցում (չի տարածվում հեռավար կարգով ուսուցման իրականացման վրա):

Սահմանափակում ԶԼՄ-ների համար՝ Վարակի վերաբերյալ միայն պաշտոնական տվյալների հղումով տեղեկատվության հրապարակման հնարավորություն:

Քրեական, վարչական պատասխանատվության հնարավորություն՝ մեկուսացման կամ ինքնամեկուսացման պահանջների խախտման պարագայում։ Օրենքի փոփոխության նախագծերը քննարկվում են Ազգային Ժողովում,

Ավելին՝ հղումով

ՀՀ Պարետի լրացուցիչ որոշմամբ՝ 22.03.2020-ից սկված Հայաստանի Հանրապետության տարածքում արգելվել են տնտեսական գործունեության հետևյալ տեսակները.

1. Առևտրի կենտրոններ և մոլլեր՝ բացառությամբ սննդի, խմիչքների, ալկոհոլային խմիչքների, ծխախոտային արտադրության ապրանքների մանրածախ առևտրի գործունեության և մոլերրում գործող սուպերմարկետների,
2. Բարերի, գիշերային ակումբների, պարահրապարակների գործունեություն, Կինոֆիլմերի ցուցադրում,
3. Խաղատներ,բուքմեյքերական և խաղագումարով գրազի կազմակերպման գործունեության սպասարկման գրասենյակներ: Ավելին՝ հղումով

ՖԻՆԱՆՍԱԿԱՆ ՈԼՈՐՏ

Վերաֆինանսավորման տոկոսադրույքի նվազեցում

Վերաֆինանսավորման տոկոսադրույքը նվազեցվել է 0.25 տոկոսային կետով և այժմ կազմում է 5.25%: Նշված փոփոխությունը պայմանավորված է համաշխարհային տնտեսության վրա կորոնավիրուսի շարունակական տարածման բացասական ազդեցությամբ: Կենտրոնական բանկի խորհրդի համապատասխան որոշումն ընդունվել է սույն թվականի մարտի 17-ին:

Ավելին՝ հղումով

Կենտրոնական բանկը թղթային փստաթղթեր չի ընդունի

Սույն թվականի մարտի 23-ից ՀՀ կենտրոնական բանկը դադարեցնում է քաղաքացիներից և իրավաբանական անձանցից թղթային տարբերակով փաստաթղթերի ընդունումը։ Փոխարենը, փաստաթղթերը պետք է ներկայացվեն էլեկտրոնային փոստով կամ Կենտրոնական բանկի պաշտոնական կայքի միջոցով: Կենտրոնական բանկի կողմից պատասխան գրությունները կուղարկվեն փաստաթղթերում նշված էլեկտրոնային հասցեներին։ Թե մինչև երբ կգործի նշված սահմանափակումը, պարզ չէ: Իրավիճակի փոփոխման դեպքում Կենտրոնական բանկը հանդես կգա նոր հայտարարությամբ։

Ավելին՝ հղումով

ՀԱՐԿԱՅԻՆ ՕՐԵՆՍԴՐՈՒԹՅՈՒՆ

Ծանուցման նոր կարգ հարկ վճարողների համար

Քննարկվում է հարկային մարմնի կողմից իր գործունեության շրջանակներում հարկ վճարողներին ծանուցումները էլեկտրոնային եղանակով տրամադրելու կարգը։  Այս կարգը չի տարածվելու հարկային ստուգումների և ուսումնասիրությունների վերաբերյալ հարկային մարմնի կողմից փաստաթղթեր ներկայացնելու վրա։

Ավելին՝ հղումով